ek khwab hai ye pyas bhi dariya bhi khwab hai
hai khwab tu bhi teri tamanna bhi khwab hai

ye iltizam-e-dida-e-khush-khwab bhi hai khwab
rang-e-bahaar qamat-e-zeba bhi khwab hai

wo manzilen bhi khwab hain aankhen hain jin se chur
han ye safar bhi khwab hai rasta bhi khwab hai

ye rifaten bhi khwab hain ye aasman bhi khwab
parwaz bhi hai khwab parinda bhi khwab hai

hain apni wahshaten bhi bas ek khwab ka tilism
yaro fusun-e-wusat-e-sahra bhi khwab hai