ek markaz pe mera zauq-e-tamasha na raha
abhi parda na raha tha abhi jalwa na raha

jo dikhae meri ghaflat ne dikhae manzar
jab khuli aankh to phir koi tamasha na raha

hae ye josh-e-wafa zauq-e-wafa kaif-e-wafa
is tarah un ka hua main ki khud apna na raha

yun to kahne ko ba-zahir jo meri haalat ho
dil ki duniya ka haqiqat mein wo naqsha na raha

kuchh nigah-e-karam-amez ne roka dil ko
kuchh mujhe hausla-e-arz-e-tamanna na raha

kyon hai duniya ko meri fikr jo un ke gham mein
gham ki duniya na rahi ya gham-e-duniya na raha

mahw thi aankh tere jalwa-e-rangin mein magar
nigah-e-dil ko ye parda bhi gawara na raha

ab isi jalwa-e-be-jalwa ki hai dil ko talash
kabhi pinhan na raha jo kabhi paida na raha

ai khuda in ke liye aur zamin paida kar
ye jahan qabil-e-arbab-e-tamanna na raha

ruh ko gharq kiya dil ko duboya 'basit'
ek rukh par kabhi sailab-e-tamanna na raha