ek misra hua ata mujh ko
sher tujh par kahun bata mujh ko

raat bhar jagne ki aadat thi
aur phir ishq ho gaya mujh ko

ai shab-e-gham kahin thikana kar
ek wali ne hai di dua mujh ko

tu kahin rakh hi na ho jae
is tarah hath mat laga mujh ko

mausam-e-hijr ja khuda-hafiz
us ne apna bana liya mujh ko

dasht-gardi mere wajud mein hai
qais bhi sochta raha mujh ko

mere pahlu mein aa ke baith kabhi
aisa lamha bhi kar ata mujh ko

istirahat mile samaat ko
aisi aae koi sada mujh ko