ek nigah us jaanib thodi dur pani par
tairte hain kuchh lashe phir huzur pani par

kashtiyan fana kar ke ja chhupe kahin tufan
jaan phenke jate hain be-qusur pani par

mujh ko tishna-kaami ne fath-yabiyan bakhshin
aur mere dushman ko tha ghurur pani par

anginat safinon mein dip jagmagate hain
raat ne lutaya hai rang-o-nur pani par

jis ko aakhir-e-shab ka ham-safar bataya hai
dekhiye wo farmae kab zuhur pani par

yun 'aqil' bikhri hain aaftab ki kirnen
jaise hon kuchh aaine chur-chur pani par