ek riwayat hai jo tabdil nahin kar sakta
main tere hukm ki tamil nahin kar sakta

reg-e-maqtal hai na talwar na neza hai yahan
tu mere shauq ki takmil nahin kar sakta

raat guzri to ye uqda bhi khula hai mujh par
main tujhe sher mein tamsil nahin kar sakta

tujh pe guzri ho qayamat to samajh bhi aae
tu mere hijr ki tawil nahin kar sakta

lakh 'asim' wo meri zat ke tukde kar de
main kisi shakhs ki tazlil nahin kar sakta