ek suraj ko surakh-ru kar ke
laut aai hun us ko chhu kar ke

be-gharaz aaj tak mila na koi
thak gai main bhi justuju kar ke

zahar ka jam hi pilaenge
log mithi si guftugu kar ke

mujh pe ungli uthaiye lekin
aaina apne ru-ba-ru kar ke

teri yaaden meri ibaadat hain
sochti hun tujhe wuzu kar ke

teri jaanib chale hain diwane
apne zakhmon ko phir rafu kar ke

hum ne dil se pukara us ko ghazal
apne chehre ko qibla-ru kar ke