ek tera hijr daimi hai mujhe
warna har chiz aarzi hai mujhe

ek saya mere taaqub mein
ek aawaz dhundti hai mujhe

meri aankhon pe do muqaddas hath
ye andhera bhi raushni hai mujhe

main sukhan mein hun us jagah ki jahan
sans lena bhi shairi hai mujhe

in parindon se bolna sikha
ped se khamushi mili hai mujhe

main use kab ka bhul-bhaal chuka
zindagi hai ki ro rahi hai mujhe

main ki kaghaz ki ek kashti hun
pahli barish hi aakhiri hai mujhe