fankar khud na thi mere fan ki sharik thi
wo ruh ke safar mein badan ki sharik thi

utra tha jis pe bab-e-haya ka waraq waraq
bistar ke ek ek shikan ki sharik thi

main ek e'tibar se aatish-parast tha
wo sare zawiyon se chaman ki sharik thi

wo nazish-e-sitara o tannar-e-mahtab
gardish ke waqt mere gahan ki sharik thi

wo ham-jalis-e-saniha-e-rahmat-e-nashat
aasaish-e-salib-o-rasan ki sharik thi

na-qabil-e-bayan andheron ke bawajud
meri dua-e-subh watan ki sharik thi