faqat takmil-e-maqsad kar raha hun
main apne aap ko rad kar raha hun

parkhache kar ke aap apni ana ke
main khud ko kar-amad kar raha hun

bhula kar dard ki gaddi-nashini
tere pahlu ko masnad kar raha hun

meri mansha ko khatir mein na lao
main kab se to radd-o-kad kar raha hun

tujhe yaksar bhula dala hai yani
tujhe main yaad behad kar raha hun

bura jo kah raha hun khud ko 'rashid'
main apni hi khushamad kar raha hun