fareb-e-kasrat-e-jalwa se aashna hun main
teri qasam tujhe tanha hi dekhta hun main

qubul jo nahin hoti wo iltija hun main
kabhi jo bar nahin aata wo muddaa hun main

mujhe na chhed dukhe dil ka tajira hun main
tamam qissa-e-nakaami-e-wafa hun main

mataa-e-am nahin jins-e-be-baha hun main
parakhne wale parakh jauhar-e-wafa hun main

rasaiyan meri mahdud hain mere dil tak
lab-ashna nahin wo aah-e-na-rasa hun main

meri hayat-e-mohabbat hai be-kasi ki hayat
khud apne haal ko bhi ghair pa raha hun main

wo raaz-e-fash hun jis par nazar nahin padti
junun ka bhes hai aur ishq-e-barmala hun main

rukh-e-hazin se numayan hai khastagi dil ki
shikast-e-rang-e-tamanna ka aaina hun main

na koi rah hai meri na koi manzil hai
faza mein khoi hui dur ki sada hun main

kahan pe dekhiye le jae ishq ki azmat
abhi to daur-e-wafa se guzar raha hun main

bahaar-e-gul ki shafaq ka ho manzar-e-rangin
tera hi naqsh-e-tabassum hai jaanta hun main

khuda kare ki ye lamhe abad se mil jaen
wo ashk puchhte jate hain ro raha hun main

jo tir ban ke kaleje ke par hoti hai
shikast-e-saz ki wo aakhiri sada hun main

jagah hai mere liye khas qalb-e-qudrat mein
dil-e-gharib se nikli hui dua hun main

'sarosh' mashq-e-gunah bhi kabhi kabhi warna
khudi na badh ke ye kahne lage khuda hun main