farhad nahin majnun ranjha bhi nahin hun
hun ishq ka mara magar itna bhi nahin hun

kyon tanz kase hain mere kirdar pe ai dost
gar achchha nahin hun tere jaisa bhi nahin hun

wo aaen to samjhen ki mera haal bura hai
main is liye ghar apna sajata bhi nahin hun

badnam mujhe kar ke wo mashhur hue hain
so is liye mahfil mein main jata bhi nahin hun

kyon dekh ke hansta hai zamana mujhe 'shiraaz'
main bhid nahin hun to tamasha bhi nahin hun