fasl-e-gul aisi na thi baad-e-saba aisi na thi
aaj se pahle zamane ki hawa aisi na thi

ye libas-e-gul ye nazm-e-gulsitan aisa na tha
surkhi-e-rang-e-shafaq bu-e-hina aisi na thi

meherban jis par hue us ki bujha di tishnagi
mere ghar par jo barasti wo ghata aisi na thi

tum ne danista wafa ke daere kam kar diye
warna pahle dilbari ki ye ada aisi na thi

aaj hum ne sach kaha to sab mukhalif ho gae
warna ye duniya kabhi hum se khafa aisi na thi