fasl-e-junun ke bab mein hum ne jo bhi kahani likhi hai
manzar-nama jaisa bhi ho baat hamari apni hai

arz-e-watan se aane wale des ka kuchh ahwal suna
khauf ki chadar odhe baithi qaum ki haalat kaisi hai

zindabaad na kahne wale kitne baghi qatl hue
muhr-ba-lab logon ke ghar kya sach-much roti pakti hai

kitne bachchon ka mustaqbil tauq-e-asiri pahne hai
kitne raushan chehron par tahrir ghulami likkhi hai

marne wale marne wale ek hi ghar mein rahte hain
chaukhat chaukhat bahne wale khun ki rangat kaisi hai

kya koi dar pe sajne wala in rahon se guzra hai
shahr ke sare raston par ye kaisi gahma-gahmi hai

tahzibon ke jangal mein ye kaisa mohazzab aaqa hai
jis ne har insan ki qimat sirf ek goli rakkhi hai

khwabon ki tabir na dhundo tabiron se khwab buno
har dil ko jo chhu kar guzre ye wo kahawat lagti hai

aaj hamein 'ashur' kisi ne behis qaum ka fard kaha
lahja talkh tha lafz bure the baat to shayad sachchi hai