faza badle hawa badle makan badle zaman badle
zara tum muskura to do ki rang-e-asman badle

na phulon mein wo bu baqi na taron mein ziya baqi
nigah-e-naz kya badli zamin-o-asman badle

kaho to kuchh mila bhi jaan-nisaron par sitam kar ke
na kuchh hasil ho jis se ab wo tarz-e-imtihan badle

wahi hum hain wahi nakaamiyan hain aur wahi gham hai
na daur-e-asman badla na daur-e-asman badle

khuda kya aur but kya dair-o-kaba kya kalisa kya
nazar aae tumhin 'nashad' ko nam-o-nishan badle