faza-e-tira-shabi ka hisab karna hai
charagh-e-sham tujhe mahtab karna hai

meri sarisht mein dakhil wafa ki pabandi
tera shiar musalsal itab karna hai

hamare shanon pe hai bojh zindagi ka magar
hamin ko fikr-e-azab-o-sawab karna hai

zamin pe zulm ki kheti bhi sukh jaegi
bas ek din use hukm-e-azab karna hai

lahu ka qatra-e-akhir bhi de ke ai 'nazir'
tamam sehn-e-chaman ko gulab karna hai