faza ki phir aasman bhar thi
khushi safar ki udan bhar thi

wo kya badan bhar khafa tha mujh se
ki aankh bhi chup guman bhar thi

ufuq ki phir ho gaya munawwar
lakir si ek ki dhyan bhar thi

wo mauj kya tut kar giri hai
to kya ye bas imtihan bhar thi

wo ek fasana zaban bhar tha
ye ek samaat ki kan bhar thi

sabab ki ab tak wo puchhta hai
meri udasi ki aan bhar thi

khula samundar ki chand bhar tha
hawa ki shab baadban bhar thi

hamin ne mismar kar dikhai
wo ek rukawat chatan bhar thi

shafaq bani aasman mein ja kar
jo khun ki bund ek nishan bhar thi

na laut paya wo jaanta tha
ki wapsi darmiyan bhar thi

kisi ghazal mein na aai 'bani'
wo ek aziyyat ki jaan bhar thi