faza mein zulf ke jadu agar bikhar jate
hawa ke sath bahut log dar-ba-dar jate

bhala hua ki hui jins-e-gham ki arzani
hum apne dagh dikhane nagar nagar jate

na jalta koi charagh-e-sada to sab sar-e-sham
lipat ke apne gharon ke sutun se mar jate

ek aisa lamha-e-sham-e-khizan bhi guzra hai
mujhe jo dekhte is lamha tum to dar jate

hamein na rok rawan hain misal-e-para-e-abr
hamare bas mein jo hota to hum thahar jate

'musawwir' aa ke na thahra koi bhi khwabon mein
udas raaton ki aankhon mein rang bhar jate