firaq-e-yar mein hun is qadar udas udas
baghair bachchon ke jaise ho ghar udas udas

shikari aae hain yani parind jaenge
ye baat sun ke hua hai shajar udas udas

na jaane kya mere zakhmon mein dekh baitha hai
ki ho gaya hai mera chaaragar udas udas

ye wo gali hai jahan shadmani rahti hai
so mere dost yahan se guzar udas udas

kabhi kabhaar to khud zar zar roti hain
udasiyan bhi mujhe dekh kar udas udas

ye kya hua ki dubo kar mujhe bade din se
khafa khafa si nadi hai bhanwar udas udas

natija tark-e-talluq ka ek sa kab hai
udhar wo khush hai bahut main idhar udas udas