firaq-e-yar mein khud ko tamam karte hue
main ro raha hun khushi gham ke nam karte hue

yun teri yaad hai aati ki jaise galiyon se
baraat guzre koi dhum-dham karte hue

wahi to hota hai har pal mere takhayyul mein
main sher kahta hun us se kalam karte hue

main qais hun so mujhe dasht mein hi rahne do
nahin ji paunga ye tam-jham karte hue

ai ishq man liya thodi apni ghalati thi
zara sa soch to jina haram karte hue