fitratan husn khubsurat hai
siratan ishq mahw-e-hairat hai

khub mashhur ye kahawat hai
har musibat ke baad rahat hai

jitni shaista hain tamannaen
utni ikhlas-e-dil ki hajat hai

hashr barpa hai zindagani mein
dil ka aana bhi kya qayamat hai

sar jhukane se sarfaraazi hai
aajizi la-zawal neamat hai

hai ye irshad haq-taala ka
khidmat-e-khalq hi ibaadat hai

kah raha hai mutala 'akmal'
ilm sau daulaton ki daulat hai