fughan-e-nim-shabi mein koi asar de de
jo ho sake to duaon ka ab samar de de

visal-e-yar ki jis mein charagh jalte hon
mere nasib ko aisa hi ek nagar de de

bas ek sawal hai us ke buland mansab se
qafas-nasib ko mumkin hai koi ghar de de

main apne zakhm khud apne lahu se sinchungi
mujhe qarar na de koi chaaragar de de

wo aankh bujh gai jis se charagh jalte the
tamam tera gharon mein koi khabar de de

main aashiyane ke tinke sajae baithi hun
hawa ke hath mein nanha sa ek sharar de de

main us ke zarf ke bare mein aur kya likkhun
jo apne sahn se duniya ko rahguzar de de

gunah sawab ke sare hi rang hon us mein
farishta chhod ke mujh ko koi bashar de de

ye raat badh gai 'iman' koi khuda ke liye
khuda se kah do ki lillah hamein sahar de de