dil mein wafa ki hai talab lab pe sawal bhi nahin
hum hain hisar-e-dard mein us ko khayal bhi nahin

wo jo ana parast hai main bhi wafa parast hun
us ki misal bhi nahin meri misal bhi nahin

ahd-e-visal-e-yar ki tujh mein nihan hain dhadkanen
mauja-e-khun-e-ehtiyat khud ko uchhaal bhi nahin

tum ko zaban de chuke dil ka jahan de chuke
ahd-e-wafa ko tod den apni majal bhi nahin

us se kaho ki do ghadi hum se wo aa mile kabhi
mana ye hai muhaal par itna muhaal bhi nahin