gai fasl-e-bahaar gulshan se
bulbulon ud chalo nasheman se

fatiha bhi padha na turbat par
ja ke laut aae meri madfan se

mujh ko kafi thi qaid-e-halqa-e-zulf
bediyan kyun banain aahan se

zulf ke pech se na rah ghafil
dosti kar dila na dushman se

ho gareban ka chaak khak rafu
tar hath aae jab na daman se

naz-o-ishwa naya nahin sikha
shokh tarrar hai ladakpan se

chhod kar tum agar gae tanha
ji nikal jaega mere tan se

hai kai din se muntazir 'rana'
jalwa dikhlao aa ke chilman se