galiyon ki udasi puchhti hai ghar ka sannata kahta hai
is shahr ka har rahne wala kyun dusre shahr mein rahta hai

ek khwab-numa bedari mein jate hue us ko dekha tha
ehsas ki lahron mein ab tak hairat ka safina bahta hai

phir jism ke manzar-name mein soe hue rang na jag utthen
is khauf se wo poshak nahin bas khwab badalta rahta hai

chhe din to badi sachchai se sanson ne payam-rasani ki
aaram ka din hai kis se kahen dil aaj jo sadme sahta hai

har ahd ne zinda ghazlon ke kitne hi jahan aabaad kiye
par tujh ko dekh ke sochta hun ek sher abhi tak rahta hai