gard-e-safar mein aankh se ojhal kitne hi rah-gir hue
jitne saya-dar shajar the rah mein daman-gir hue

jiwan bhar ka bandhan hum to ghar se tod ke nikle the
lekin kuchh an-jaane rishte pairon ki zanjir hue

khel hi khel mein ek khilauna hath se gir kar tut gaya
nanhe munne hanste bachche ashkon ki taswir hue

hum ne jo tahriren likkhin sab ki sab matruk huin
waqt ke hathon hum bhi kaisi be-mani tafsir hue