gham-e-darun ka koi tarjuman nahin na sahi
jo zakhm-e-dil bhi dahan-e-fughan nahin na sahi

ye kam nahin hai ki aankhon mein dil utar aaya
tumhaare samne munh mein zaban nahin na sahi

yahan to koi nahin jis ka dil hila doge
jigar mein taqat-e-zabt-e-fughan nahin na sahi

tujhi se shikwa-e-dard-e-nihan karen ai dil
tere siwa jo koi raazdan nahin na sahi

chaman mein aag laga di jo barq-e-sozan ne
to shakh-e-gul pe mera aashiyan nahin na sahi

abhi kuchh aur gharaunde banao yaadon ke
ghubar-e-rah to hai karwan nahin na sahi

zamin to panw tale hai yahi ghanimat hai
hamare zer-e-qadam aasman nahin na sahi