gham-e-duniya ko bas meri taraf aane ki jaldi hai
har achchhe waqt ko mujh se bichhad jaane ki jaldi hai

bada nuqsan kar baithi main apna jald-bazi mein
usi ko kho diya main ne jise pane ki jaldi hai

tum itna mukhtasar sa waqt le kar aae hi kyon the
idhar aane mein deri ki udhar jaane ki jaldi thi

hata kar rah ke kante nikal aai saliqe se
mujhe jab manzil-e-maqsud ko pane ki jaldi thi

'siya' sab kah rahe hain zindagi ki aur ab dekho
magar dil ki tamannaon ko mar jaane ki jaldi hai