gham gawara bhi nahin gham se kinara bhi nahin
aur is zindagi-e-ishq se chaara bhi nahin

kis ne ulti hai ye apne rukh-e-taban se naqab
chand to chand falak par koi tara bhi nahin

main unhen apna kahun maslihaten us ke khilaf
wo mujhe ghair samajh len ye gawara bhi nahin

kya kiya hae ye ehsas-e-khud-agahi ne
ab wahan hun ki jahan rah ke tumhaara bhi nahin

jaane kya baat samajh lenge 'hayat' us ko wo
hum ne is khauf se un ko to pukara bhi nahin