gham-gusari ka hai aalam dur tak
ghas par phaili hai shabnam dur tak

ek hi jaisi faza hai chaar-su
ek hi jaisa hai mausam dur tak

zakhm apne dekh kar zahir hua
bantta hai koi marham dur tak

chhedti hai be-khudi ke silsile
shab ke sannaton mein sargam dur tak

apne mustaqbil se hote ba-khabar
dekh pate kash jo hum dur tak

sahil-o-dariya ko 'khanda' kya likhun
dekhti hun koi sangam dur tak