gham ki dhup aur gham ke shajar bakhsh de
mujh ko maqtal ki sab rahguzar bakhsh de

phenk kar koi patthar na mayus ho
dil ki shakhon mein itne samar bakhsh de

sare chehre yahan aashna ban gae
ajnabi shahr ka ab safar bakhsh de

ab chatanon mein aabaadiyan dhal gain
mujh ko tesha-gari ka hunar bakhsh de

mud ke dekhun to patthar ka ban jaun main
ek sada aisi bhi mo'atabar bakhsh de

rut badalte rafiq-e-qalam ko mere
ek mera e'tibar-e-nazar bakhsh de

kaam aaen jo ghairon ke mere siwa
in duaon mein meri asar bakhsh de

pyas hi pyas hai jab muqaddar mera
karbala ki mujhe dopahar bakhsh de