gham na kar ai wahshat-e-dil tilmilana chhod de
muskura ke ashk pi aansu bahana chhod de

aandhiyon se gham ki bujhne pae na dil ka charagh
kharzaron mein alam ki aana-jaana chhod de

hai kaf-e-afsos malna ain tauhin-e-wafa
zindagi kahti hai lekin ye bahana chhod de

hum wo kante hain agar uljhe to thamenge waqar
gulsitan mein khauf se daman bachana chhod de

quwwat-e-bazu se 'talib' tod de zindan ke bab
nang-e-hasti hai qafas ka aab-o-dana chhod de