har ek goshe mein rang-e-bahaar dekha hai
meri nigah ne jalwa hazar dekha hai

sabhi to jalwa-e-jaanan ka kar rahe the gila
nigah-e-lutf-o-karam kis ne yar dekha hai

hum un ki bazm se mayus uth gae lekin
nigah-e-husn ko aaina-dar dekha hai

kali kali mein gulistan mein fitrat-e-gul mein
kahan kahan na dil-e-be-qarar dekha hai

gawahi dete hain rah rah ke aaj ai 'talib'
falak ke chand-sitaron ne pyar dekha hai