gham uthane ke hain hazar tariq
ki zamane ke hain hazar tariq

ghair ke zikr par nahin mauquf
ji jalane ke hain hazar tariq

mehrbani ki ek rah to ho
gar satane ke hain hazar tariq

dil mein aaya hazar rah se gham
is thikane ke hain hazar tariq

un ko sau-sau bahane aate hain
har bahane ke hain hazar tariq

di hai mai us ne ghair ko juthi
munh lagane ke hain hazar tariq

'dagh' ab faqa-mast ban baithe
mang khane ke hain hazar tariq