gham-zada kitna hamare zehn ka saya raha
sang-zar-e-fikr-o-fan se khud ko takraata raha

main tafakkur ke andhere ghaar mein baitha raha
pas mere wahimon ke sher ka dera raha

hirs ke khurshid ki aisi pazirai hui
azmaton ke aasman ka rang phika sa raha

lafz ki barish mein sari raushnai dhul gai
waqt ka qirtas pahle ki tarah sada raha

hat ke mehwar se khala mein kitne tare gum hue
gardishon mein aagahi ka ek sayyara raha

zindagi ki zahr-naki khatm ho jati magar
khwahishon ke nag se main khud ko daswata raha

hum ne 'jami' ghar ke andar aafiyat mahsus ki
khauf ka saya pas-e-diwar lahraata raha