gham-zada main bhi nahin aur ghamin tu bhi nahin
ab to paband-e-wafa main bhi nahin tu bhi nahin

main bhi uftada-e-andaza-e-tamanna-e-hayat
yani doshiza-e-firdaus-e-barin tu bhi nahin

ai shafaq-khezi-e-ijmal-e-sahar sad-afsos
aks-e-tariki-e-shab-ha-e-hazin tu bhi nahin

main ki ham-zad-e-nashinan-e-harim-e-khast
hae kashana-e-be-khas ka makin tu bhi nahin

zinat-e-saya-e-diwar-e-makan mera guman
aur koi bhi nahin saya-nashin tu bhi nahin

ruh-e-pazh-murda-e-takhayyul lab-o-mushaf-e-naz
is udasi ka sabab mere tain tu bhi nahin

fitrat-e-gardish-e-alam-e-taghayyur se wara
khugar-e-aish magar main bhi nahin tu bhi nahin