ghani-ghaneri raat mein darne wala main
sannate ki tarah bikharne wala main

jaane kaun us par bulata hai mujh ko
chadhi nadi ke bich utarne wala main

ruswai to ruswai manzur mujhe
dare dare se panw na dharne wala main

mere liye kya chiz hai tujh se badh kar yar
sath hi jine sath hi marne wala main

sab kuchh kah ke tod liya hai nata kya
main kya bolun baat na karne wala main

tarah tarah ke waraq banane wala tu
teri khushi ke rang hi bharne wala main

daim, abadi, waqt guzarne wala tu
manzar, saya, dekh thaharne wala main