ghar aangan ka manzar badla badla hai
har gulshan ka manzar badla badla hai

maskh hui hai mushtarka tahzib yahan
gang-o-jaman ka manzar badla badla hai

aaj yahan kuchh sharm-o-haya ki dewi ke
pairahan ka manzar badla badla hai

corona ne aise din dikhlae hain
bazm-e-sukhan ka manzar badla badla hai

gale milen kya hath milana hai mushkil
id-milan ka manzar badla badla hai

sach ko sach kahne se wo bhi hai qasir
har darpan ka manzar badla badla hai