ghariq-e-jalwa kisi jalwa-gar ko kya dekhe
jo teri dhun mein chala rahguzar ko kya dekhe

sahar ke sath hi sar par chadha pahad sa din
sar-e-khamida jamal-e-sahar ko kya dekhe

dabe hue hain makin bar-e-sang-e-ahan se
gharib-e-shahr yahan baam-o-dar ko kya dekhe

musafiron ki tarah manzilen safar mein hain
kidhar ko jae koi rahguzar ko kya dekhe

lagan hai sab ko siyasat ki dhun hai daulat ki
ab is junun mein koi khair-o-shar ko kya dekhe

sukhi hun ghar pe laga kar khulus ki takhti
ab aae kaun udhar mere ghar ko kya dekhe

nae nisab mein tir-e-nazar ka bab nahin
so chaaragar mere zakhm-e-jigar ko kya dekhe