ghat ke pas se guzregi zara dhyan rahe
faltu baat na karna ki mera man rahe

tu nahin tha to har ek shor bhi sannata tha
yani hum saut-o-sada mein bhi pareshan rahe

ghar se nikla hun dua koi nahin sath mere
kaise mumkin hai ki ab rasta aasan rahe

khush-nasibi ki mujhe dekh ke wo hont khule
aur dukh ye ki mere nam se anjaan rahe

tere aane pe kai phul khile the jin mein
tere jaane se wo gul-dan pareshan rahe

han magar khidkiyan khulne lagin chillane se
dar-o-diwar ki be-jaan the be-jaan rahe

samna ho to pashemani na ho chehron par
kam se kam itna ta'alluq to meri jaan rahe

jis pe ek bar tera naqsh-e-qadam pad jae
kaise mumkin hai ki wo rasta viran rahe

rauzan-e-shab ke darichon se hawa aati rahe
sans-dar-sans har ek marhala aasan rahe

kanpte hath se us but ko chhua tha 'arib'
kya ajab hai ki salamat mera iman rahe