girah lab pe jo muddaa ho gaya
wo dil mein mere aabla ho gaya

samajhte hain wo farz is ki shikast
mera dil bhi ahd-e-wafa ho gaya

kahun kya na dekhen jo meri taraf
taghaful sharik-e-haya ho gaya

wo karte hain sun kar sitam aur bhi
mera nala shukr-e-jafa ho gaya

qayamat hui us ki raftar se
ye hangama hangama-za ho gaya

bad-o-nek ka un pe kya e'tiraaz
jo chaha kiya jo kiya ho gaya

shab-e-wasl hone ki hai ye dalil
shab-e-hijr se din siwa ho gaya

asar sab khicha us ki guftar mein
mera nala bhi na-rasa ho gaya

wo surat hai dilkash ki is zulm par
zamana tera mubtala ho gaya

mila de jigar ko bhi dil mein khuda
ki ab shauq had se siwa ho gaya

gham-o-ranj-o-hirman-o-andoh ko
mera sina mulk-e-baqa ho gaya

mohabbat mein ilzam kya dil ko dun
ye gumrah tha mujh ko kya ho gaya

hujum-e-bala-ha-e-hijran na puchh
tujhe kya jo kuchh ho gaya ho gaya

anal-ishq kahna na aaya magar
ki mansur anal-haq-sara ho gaya

ye taqwa jawani mein 'salik' magar
bure waqt mein parsa ho gaya