girte girte sanbhal bhi sakta hai
aadmi hai badal bhi sakta hai

kuchh bhi qimat nahin sadaqat ki
khota sikka to chal bhi sakta hai

mujh se baaten karo na hans hans kar
dekh kar koi jal bhi sakta hai

khalish-e-dil aziz hai mujh ko
warna kanta nikal bhi sakta hai

rone wale rahe khayal is ka
ashk palkon se dhal bhi sakta hai

apna daman sanbhaal kar rakhiye
koi dhabba machal bhi sakta hai

ab mayassar kahan hai wo lamha
jis ka gham ho ki tal bhi sakta hai

gham se lagti hai chot bhi dil par
gham se insan bahal bhi sakta hai

aankh ki rahguzar se ho ke 'shamim'
khwab sine mein pal bhi sakta hai