go aur bhi gham shamil-e-gham ho ke rahenge
hum fateh-e-har-ranj-o-alam ho ke rahenge

be-baki-e-tahrir ye dastur-e-khudawand
ek roz mere hath qalam ho ke rahenge

ai mard-e-sukhan jurm-e-sukhan khub hain lekin
ye jurm tere khun se raqam ho ke rahenge

kabe se nikale hue but pujne walo
kya phir ye shanasa-e-haram ho ke rahenge

kahte hain ki har qatra-e-tufan ko daba do
qatron ko ye zid hai ki wo yam ho ke rahenge