gul ko bu bulbul ko naghma chahiye
ai dil-e-muztar tujhe kya chahiye

nim-shab mein ho tulu-e-aftab
ai gham-e-dil aisa naghma chahiye

ye sitare qatra-e-shabnam banen
soz-e-dil pur-dard nala chahiye

tu bahut achchha hai lekin ai nigar
dil ko kuchh tujh se bhi achchha chahiye

meri hasti ko inayat ki nazar
khirman-e-dahqan ko shoala chahiye

ramz-e-ulfat hai yahi ahl-e-wafa
aaina dil ka shikasta chahiye

gesu-e-jaanan agar suljha to kya
gesu-e-geti sanwarna chahiye

zindagi-e-khizr ki hajat nahin
sarkhushi ka ek lamha chahiye

dil ki khwahish hajat-e-darwesh hai
tere dar se kuchh to milna chahiye

main nasim-e-subh hun mujhe se hijab
ai urus-e-lala aisa chahiye

'taj' hai banda tera husn-e-azal
kya bhala is se bhi parda chahiye