diwana kahe hai koi farzana kahe hai
ai 'taj' zamana tujhe kya kya na kahe hai

phulon ki khamoshi ho ki bulbul ki fughan ho
unwan badal kar mera afsana kahe hai

anjam-e-mohabbat hai dil-o-jaan se guzarna
har subh ye khakistar-e-parwana kahe hai

kya fikr hai saqi jo mai-o-jam nahin hain
duniya teri aankhon hi ko paimana kahe hai

pursish se hua aur bhi kuchh dard ziyaada
achchhe ho kaha jaise ki begana kahe hai

dil kah ke pukare hai jise sara zamana
'taj' us ko magar husn ka nazrana kahe hai