gulshan mein rang-o-nur ke paikar mein kaun hai
khushbu mein konpalon mein gul-e-tar mein kaun hai

ye kaun sa maqam hai khidmat ka ai khuda
jarub-kash ye khana-e-be-zar mein kaun hai

maujen tadap rahi hain kinare hain zer-e-ab
mazlum ab jahan-e-samundar mein kaun hai

qaem tujhi se jab ki uruj-o-zawal hai
ai waqt tu hi bol ki chakkar mein kaun hai

nazron ki sidhiyon se utarta hai dil mein kaun
khushbu ki tarah ruh ke paikar mein kaun hai

'mukhlis' tum us ka nam batate nahin ho kyon
bartar hai hum mein kaun barabar mein kaun hai