guman mein hai yaqin jaise
ugal de sona zamin jaise

hun qaid sham-o-sahar mein aise
sada-ba-lab ho machine jaise

main aasman ki panah mein hun
zamin ke manzar hasin jaise

shab-e-tamanna ke chand tare
hon apne ghar mein makin jaise

hain mere andar ke sanp bahar
hai mere honton pe bin jaise

na koi sabza na bel-buta
shajar hai sahra-nashin jaise

to muraton mein bhi jaan aae
jhuka de sar mah-jabin jaise