guman to thik main kaise kahun yaqin bhi hai
ki mere panw ke niche kahin zamin bhi hai

dilon mein duniya basae hue to phirte ho
khayal rakhna ki duniya ke sath din bhi hai

hamare jaib-o-gareban mein sanp kya milta
use khabar hi nahin thi ki aastin bhi hai

taras jo kha ke kisi jaanwar pe shah bane
hujum-e-shah mein koi sabuktagin bhi hai

sukhan-shanas nahin zud-go bhi hai 'jawed'
padha-likha hi nahin aadmi zahin bhi hai