gumrahi mein nae rabte mil gae
rah bhatke hue qafile mil gae

meri tanha-rawi ka bharam mit gaya
ham-safar raston mein nae mil gae

jaane wale isi mod par ek din
phir milenge agar raste mil gae

main tere aur nazdik aa jaunga
qurbaton mein agar fasle mil gae

teri taswir album se gum thi magar
khat kai tere likhe hue mil gae

jaane kya baat thi aaj pardes mein
ajnabi ajnabi se gale mil gae

aaj phir raat ki aankh nam ho gai
phir se hum khwab ko jagte mil gae