haal-e-dil main ne jo duniya ko sunana chaha
mujh ko har shakhs ne dil apna dikhana chaha

apni taswir banane ke liye duniya mein
main ne har rang pe ek rang chadhana chaha

khak-e-dil jauhar-e-aina ke kaam aa hi gai
lakh duniya ne nigahon se girana chaha

shoala-e-barq se gulshan ko bachane ke liye
main ne har aag ko sine mein chhupana chaha

apne aibon ko chhupane ke liye duniya mein
main ne har shakhs pe ilzam lagana chaha

ghairat-e-mauj use phenk gai sahil par
dubne wale ne jab shor machana chaha