had se guzar gaya gham-e-dauran kabhi kabhi
daman mein ashk ho gae ghaltan kabhi kabhi

jab zoam-e-aql-o-hosh se kuchh bhi na ban saka
kaam aa gai hai jurat-e-rindan kabhi kabhi

aate hain inqalab kabhi bahar-e-inqalab
kashti ko par karte hain tufan kabhi kabhi

sar de diya diya na magar ghair-e-haq ka sath
duniya mein aae aise bhi insan kabhi kabhi

kya kalba-e-hazin mein nahin raunaq-e-hayat
hota hai dil yahan bhi ghazal-khwan kabhi kabhi

ghabra ke zindagi se talash-e-qarar mein
chhani hai khak-e-dasht-o-bayaban kabhi kabhi

har chand hai dakan se mujhe pyar 'tahira'
aati hai yaad mahfil-e-tahran kabhi kabhi